Isa 25 | NdeIBE | STEP | O Jehova, wena unguNkulunkulu wami; ngizakudumisa ngibabaza ibizo lakho ngoba ngokuthembeka okupheleleyo, wenze izinto ezimangalisayo, izinto ezamiswa endulo.

Isaiah 25

Ukubonga uJehova

1 O Jehova, wena unguNkulunkulu wami; ngizakudumisa ngibabaza ibizo lakho ngoba ngokuthembeka okupheleleyo, wenze izinto ezimangalisayo, izinto ezamiswa endulo.

2 Wenze idolobho laba yinqwaba yemfucuza; idolobho elivikelweyo laba lunxiwa, inqaba yabezizweni kayiseyilo dolobho; kayiyikwakhiwa futhi.

3 Ngakho-ke abantu abalamandla bazakudumisa, amadolobho ezizwe ezilolunya azakwesaba.

4 Ubuyisiphephelo sabayanga, isiphephelo soswelayo osizini lwakhe, isivikelo esivunguzaneni. Ngoba umoya wabalolunya unjengesiphepho sitshayeka emdulini,

5 lanjengokutshisa kwasenkangala. Wena uthulisa umsindo wabezizweni; njengokutshisa kusehliswa ngumthunzi weyezi, ithuliswa kanjalo lengoma yabalolunya.

6 Phezu kwale intaba uJehova uSomandla uzakwenzela abantu bonke idili lokudla okumnandi, idili lewayini elidala – inyama enhle kakhulu lewayini elihle kakhulu.

7 Phezu kwale intaba uzadiliza isembeso esimboze abantu bonke, ilembu elembese izizwe zonke;

8 uzakuginya kokuphela ukufa. UJehova Wobukhosi uzakwesula izinyembezi ebusweni babantu bonke; uzasusa ihlazo labantu bakhe emhlabeni wonke. UJehova usekhulumile.

9 Ngalolosuku bazakuthi, “Ngempela lo nguNkulunkulu wethu; sethemba kuye, wasikhulula. Lo nguJehova, sethemba kuye; kasithokozeni sithabe ngokusisindisa kwakhe.”

10 Isandla sikaJehova sizahlala phezu kwalʼintaba; kodwa uMowabi uzanyathelelwa ngaphansi kwakhe njengotshani bunyathelelwa phansi emqubeni.

11 Bazakwelulela izandla zabo kuye, njengenhlambi iselula izandla zayo ukuba intsheze. UNkulunkulu uzakuqeda ukuzigqaja kwabo phezu kokuhlakanipha kwezandla zabo.

12 Uzadiliza imiduli yenu ephakemeyo njalo evikelweyo ayiwisele phansi; uzayidilizela phansi emhlabathini, kulo kanye uthuli.